3ab hadi pics

3ab hadi portrait

this is a drawing portrait from fan of 3ab hadi beatz

اعادة التأهيل
المنافس الوحيد ليك هو انت
تراك جديد بيعبر عن فكري نحية الناس اللي ملهاش لزمة اللي بتعمل ديسات , و تشجيع للمبتدئين و رد علي الناقضين اللي بيقولوا اني عايش ف فلو واحد , صعب تعمل تراك زي ده
الكلمات و المزيكا و الهندسة لوحدي  طبعاً
الكلمات

chorus
المنافس الوحيد ليك هو انت
لو كلامك علي ورق احنا كلامنا ف الأجنده
هاخدك م اللي انت فيه لكام دقيقة راب جامدة
قيمة راب الحي التالت في الكلام مش في العدة
(X2)

فيرس 1

بدأ العد التنازلي للقنبلة
كلنا ميتين مش هي دي المعضلة
توب و قدم العذاري للتضحية
جأت في سلام مش عايز أعمل بلبله
المشكلة ف النظام يا كورك
الأغنية دي اعتبرها قرصة مني ف الورك
اسمعها 100 مرة و احفظها و لما تحفظ كلامها
و تعرف تقوله اعتبره هوم وورك

قلم الراب لسه مخلصش الحبر بتاعه
الراب حرية رأي مش وشم علي دراعه
مش تطليع بتاعه الجهل بتاعه و بتاع أهله
اللي بالينا ربنا بيه الراب فكره و اتساعه
و اتساع الدماغ لاستقبال الكلام الجديد
لسان حديد يضرب نار كلام مفيش غير واحد وحيد
يخرجه علي مزيكا زي دي و ف كل ركن من أركانها
ببدا طريقي ف الحلب و التفتيت

كلامي مش لسميعة المهرجانات
و اللي بيراب عشان يعجب البنات
احنا بنعمل قضية احنا بنأرخ فن لا فاني
بنحل مشاكل العالم و بنلبي الاحتياجات
من دلوقتي اللي فات مات عايزين الراب سات يزيع ماتشات تنافسية عن رابرانجية متفقين علي اتفاقية جات
هات المايك و رفع صوتك زي الرات السندق و غني علي المزيكا دوم دوم تاك تاك تات

كورال
المنافس الوحيد ليك هو انت
لو كلامك علي ورق احنا كلامنا ف الأجنده
هاخدك م اللي انت فيه لكام دقيقة راب جامدة
قيمة راب الحي التالت في الكلام مش ف تمن العدة

فيرس 2

لو عايز كام لايك اعمل شعرك سبايك
أو اعملك سكسوكة أو ظبط فان دايك
اعمل أغنية كوميدية بكلام مسف و قالش
اضحك علي الودان و اشتغل ف المفارش
انهارده بيسمعوك بكرة يقولوا دي قديمة
فنك وضيع و مسكك للمايك جريمة
الراب صوتك بالنيابة عن البكم
و تذكرة رحلة ذكريات و حكايات عظيمة

اكتب كتابات ككتاباتي فكتاباتي كونت كتب
كتايب من الكتاب كتبوا الاكتتابات لتوريثي الكتابة كفن
قوافل من القوافي اقتفوا أثارها المقتفين يقطفوا منها قوافي
فاقتفي أثر المقتفين كي لا اقتفي من قافيتي المن

مش بعقدك انا بعلمك
الراب ثقافة تفتح مخك و تفهمك
مش شتايم و صياعة و أي كلام فاضي
للصياعة هتنفعك و لا الشتايم هترسمك
اقري و اقري و بعديها غني للخلود
غني عن الفقرا و الملوك و الوجود
خلينا يتقال علينا فن كلامه عميق
مش مجال للغرور و الفكسان و البرود

اصبر بكرة شعرك يتشهر
و من عشرات من عشيرتك تتشكر
و في جملة الشعرا تتشمل
و بين الفقرا و المساكين شينك تتنشر
ضادك تتشهد تستشهد بيها العشاير
كلامك الحماسي بيخلي الدم فاير
ف الالفاظ كرم و المسامع حرم
خلي ف أخلاقك نهم مع الصالحين تتحشر

كورال
المنافس الوحيد ليك هو انت
لو كلامك علي ورق احنا كلامنا ف الأجنده
هاخدك م اللي انت فيه لكام دقيقة راب جامدة
قيمة راب الحي التالت في الكلام مش ف تمن العدة

كلمات و تفسير أغنية الدجال ( عب هادي المنير ) 3ab hadi _ l_ Anticrist lyrics & explanation

كلمات أغنية الدجال
_______
كلمات : عب هادي
موسيقي مقتبسة من كلاسيكيات موزارت

لما بطش كف بدلة حف خد شاب مخ كهل
شت عقله اسود قلبه قلب معني الأمن قمع
قلب المعني سهل لشاشة الدجال  , لوهلة
صدق المغتر بدلة الاعلامي و انت حر

بعد الظن اثم , بعد الحكم سجن , فجر
ظلم العبد يغضب رب كل الخلق لكن خلقه
مش مهتم بالحساب و الدليل كان كم طلق نار
مدافع عملت بحر دم جيل بعمر ورد

جيل بعمر ورد اتعري حس برد عبد
جف ريق الفم لما تف عالنظام و عف
عف كل حزب شر لما بدأت حرب فر
كل خير و لازمه شر كل بحر لازمه بر

كل حق لا يكل باطل لا يستمر
فلا دماء تحل و لا بشر يجل
لا نطق لا حق للدمي ف الفتي
لا زهو ف القتل لا قمع يإل

شعر الدقن عورة فلق صدر الست لأ
رقص الست فرحة و دي بلد متقولش لأ
اعلان لتايجر كينج قبل بعد أي فيلم , نص
شعب مصر نفسه يمص صدر جاموسة عشر

مش قلة أدب بس مش لاقيلها دخل
وصل وطن برقص أو وصل مغني بسكس
وصل شاب للقبور وصل جبن للجحور
وصل الغرور بشخص انه يوصل للفجور

التفسير
__________
______
___

شغلها تاني
البدلة المقصود بيها الداخلية أو الجيش ...., حف خد شاب يعني تعدي عليه .... , مخ كهل أقصد بيها ان المقصود ف عملية القمع دي هما الشباب الفاهم اللي مخهم وصل للنضج ..., ( شت عقله اسود قلبه قلب معني الأمن قمع ) دي ان الشاب ده اتجنن و اتغيرت عنده المفاهيم , مش المفروض ان البدلة دي عشان توفرله الأمن و الأمان ؟
.... (قلب المعني سهل لشاشة الدجال ) شاشة الدجال المقصود بيها الاعلام , و طبيعي عندهم انهم يعكسوا أي حاجة ... ( لوهلة صدق المغتر بدلة العلامي ) أقصد ان البني آدم بيصدق الاعلامي و ممكن يكدب المنطق ف لحظة معينة ... و آخر الكلام بقولك ( انت حر )

بعد الظن اثم دي مسلمة و بعد الحكم سجن زي مبارك و مرسي و اللي جاي برده هيمشي عليه القانون , الظلم يغضب ربنا لكن زي م السيسي قال أي حاجة تغضب ربنا احنا معاها , و الدليل كمية النار و التحالف مع البلطجية علي شباب من 14 ل 20 سنة بس , ده غير الناس اللي ماتت من ثورة 25 لغاية دلوقت

الجيل ده اتعري و اتجرد من كل حريته بقي زي العبد بالظبط , و الأحزاب و كل من له مصلحة سياسية عف زي الدبان علي الكحكة , و لما تبدأ حرب سياسية يهربوا , و احنا الآداه , مهما كانت نيتك خير فهتلاقي جمبك حد نيته شر , دي مسلمة زي كل خير و لازمه شر و كل بحر لازمه بر

كل حق لا يكل , الباطل مش بيستمر , مفيش دم حلال و دم حرام , و مينفعش نجلل بشر و نعظمه و نألهه و العياذ بالله زي م بيحصل دلوقت
و مينفعش واحد زي علي جمعه يفتي ف حاجة , ده دمية النظام من أيام مبارك
بحس ف فيديوهاته انه فخور بالقتل , لا قمع ( يإل ) يعني يقصر كأنه واجب عليهم مش الأمن اللي واجب عليهم

شعر الدقن بقي عورة فلق صدر أي مغنية و أي ممثلة بقي عادي
رقص الستات عادي فرحة التصويت ؟
اعلان لتايجر كينج قبل و بعد أي فيلم
  كل شعب مصر بقي همه الكلام ده بس

مش قلة أدب لأن الكلام وحش , أنا بوصف المجتمع , المجتمع وحش
ايه ف الدستور يرقص , و ازاي أغنية زي تسلم الأيادي المفروض انها تكون وطنية تبقي علي واحدة و نص , و ليه كل المغنيات اللي بيغنوا للسيسي تحس انهم خارجين من فيلم سكس

و ليه بقي الشباب تموت و العواجيز تحط البيادات علي دماغهم ؟الغرور وصل الحاكم للفجور

ما يجب عليك معرفته عن أغنية (اعترافات تحت تأثيرات الكحول)

ALCOHL 3ABHADI FT ROMAER
عب هادي & روماير (اعترافات تحت تأثيرات الكحول)

-الأغنية عملت مشاهدات أقل من المتوقع بسبب الصورة دي

- الكلمات اتكتبت علي بيت من بيتات عب هادي و اتمكسجت علي مزيكا تانية و اترفضت عشان كان فيها جيتار و المزيكا اللي بتسمعها دلوقت اتعملت ف الآخر و كان الشرط الأساسي من الشركة المنتجة المتمثلة ف الحي التالت انها تحتوي علي جيتار كهربا

- الكلمات أخدت من الوقت 12 يوم تقريباً ف كل يوم كان بيتكتب بار (أربع سطور تقريباً)

- سمعها قبل ما تتنشر أكتر من 20 واحد لازم يتاخد رأيهم قالوا عنها نفس الكلام تقريباً ( الكلمات تمام البيت تمام التمام الكواليتي ضعيف شوية)

- تسجيل الأغنية كان بايظ و كان المفروض هنسجلها تاني لكن قولنا نوفر المجهود  الأغنية الجاية .. الكواليتي شارك ف تعديله 3 موزعين صوت هواه لغاية ما طلعت بالشكل ده

- شارك ف خروج الأغنية ( 5 أشخاص )

- كلمات الأغنية الكل فهمها علي انها اعترافات فعلاً .. لكن كان المقصود بيها الصراع الداخلي اللي بيحصل مع أي بني آدم

- لما آخدنا آراء اصحابنا بعد نشرها لقينا ان كل واحد عجبه بار و معجبوش بار .. اكتشفنا ان البار اللي عاجبك هي حاجة كان نفسك تعترف بيها , و اللي مش عاجبك حاجة انت مش عايز تعترف بيها